कवि लेखक- श्री राम बहादुर राय संपर्क सूत्र- +91-9102331513

सुनले बानी ए माई रवुरी मयरिया! -------------------------------------------- आइल बानी ए माई रवुरी दुवरिया छपले बा हमरे के सगरी अन्हरिया! पूछे ना हमरा के गंवुआ नगरिया माथवा नववले बानी रवुरी दुवरिया! बीच भंवर में मोर फंसल बे नइया हमरा रोवला से गिरे बन के पतइया! बिगरल बाटे ए माई हमरी समइया तोहरे सिवा नाहीं कवनो खेवइया! हमरो उठावऽ माई ,गिरली पगरिया देखि-देखि हंसेला गंवुआ नगरिया! अपने भगतवा के हो जइतू सहइया घात लगा के बाटे बइठल मुदइया! लउकत नइखे कौनो दूसरो रहतिया पूछे नाहीं कवनो साथी संहतिया! सुनले बानी ए माई रवुरी मयरिया कृपा करेलू , केहू आवेला दुवरिया! थाकि हारि के देखिले रवुरी रहतिया कृपा करिके काटऽ हमरी बिपतिया! दिहऽ आसीस दूर करे के बिपतिया तोहके चढ़इबे माई नरियर चुनरिया! ---------------- राम बहादुर राय भरौली,बलिया,उत्तर प्रदेश #highlight #भोजपुरी

बड़ा नीक लागे संइया के सुरतिया ------------------------------------------- बड़ा नीक लागे सइयां के सुरतिया तनिको बुझाला नाहीं दिनवा रतिया। काम करीं खूब तबो नाहीं थाकिले तोहरे नीनी सुतिले अउर जागिले। बड़ा नीक लागे....................... तोहरा के निरखिले दिने दुपहरिया हटे नाहीं पल भर तोहसे नजरिया। तोहरे खातिर बहुत बरत हम कइनी बिसनु जी के कृपा से तोहके पइनी। बड़ा नीक लागे.......................... तोहरा बिनु जिनगी रहे खूंख पइया खुसी के रंग भरि दिहलऽ ए संइया। दिन हऽ कि रात कुछवू ना बुझाला तोहरा आगे कुछू नीको ना बुझाला। बड़ा नीक लागे........................ हमरा के देखवलऽ प्रेम के दुवरिया ना त घूमत रहितीं बन के पंवरिया। जिनगी बनवलऽ स्वर्ग हो संहतिया सुतलो में देखिला तोहरी सुरतिया। बड़ा नीक लागे संइया के सुरतिया हटे नाहीं पल भर तोहसे नजरिया। --------------- राम बहादुर राय भरौली,बलिया,उत्तर प्रदेश #भोजपुरी #highlight