कबो कबो याद आवे लरिक॓इयां
बड़ा याद आवे लरिकइंया
--------------------------------
कबो-कबो बड़ा मन परेला
आपन लरिकइया।
सावन के बरिसत बदरिया
कागज के नइया।
भादो के झपटी से टूट गिरे
छप से छजनिया।
छावल-छोपल रहत रहल
मोटकी देवलिया।
धरन-बड़ेंरा रखवारी करत
घर के भितरिया।
बांस के कोरो सुतले जागे
ढ़ोवत खपरिया।
सावन-भदवारी के झपसी
भेंवे चारपयिया।
भींजल खोतवा ताके माई
टूटत सनेहिया।
कबो-कबो बड़ा मन परेला
पहिले के बतिया।
सब केहू एकही संगे रहल
एकही अंगनइया।
रुखल सूखल खात रहिंजा
निरोगित शरीरिया।
भरल रहे चवुवन से दुवार
मिले दूध-दहिया।
लुटाई गइल रीति के गठरी
नइखे उ पिरितिया।
नवका से नीक पुरनके रहे
मिले नेह मिठइया।
--------------
रचना स्वरचित,मौलिक
@राम बहादुर राय
भरौली,बलिया,उत्तर प्रदेश
@followers
Comments
Post a Comment