-
६१-गॉंव के गोहार
-----------------
धरती से आकास तक,भइल बा धूर धूर
आवत नइखे समझ में,आइल कइसे धूर।।

लेके आरी काटता,गॉंव नगर के फेंड़
काट कूट के बेचता,जइसे होखे रेंड़।।

आम महुआ जामुन के,नइखे लागत थाह
काटत बाटे जे फेंड़,परी ओहपर आह।।

लवना लकड़ी ना मिली,मिली कहां अब छांह
दतुवन पल्लो के अब तऽ,ठूंठ हो गइल जाह।।

चुवत रहे आम महुआ,बिने सब रहे जात
आन्ही पानी रहे भा,होत रहे बरसात।।

होखत रहे अगोरिया,चुवत रहे जब आम
बइठल रहे लोग उहां,छोड़ि छाड़ि के काम।।

पाकल अमवा खाइके,भरि जात रहे पेट
मिले लपसी महुआ के,खाव लोग भरपेट।।

‌रहत रही सोन चिरई,फेंड़वे फर लुकास
कटि गइल बा फेंड़ ओंड़,होई गइल विकास।।

रहबू कहां ए चिरई,कटा गइल सब फेंड़
कहां रही अब खोंड़िला,नइखे लउकत फेंड़।।

सुग्गा मैना चोंचा,नेउर कुकुर बिलार
खेंखर खरगोस कहता,अदिमी भइल सियार।।

रहल गॉंव के आसरा,उहो गइल अब टूट
सहर से गइल गॉंव बा,मचल बा जहां लूट।।

अब तऽ हालत ई भइल,सहर रहल ना गॉंव
दिन दिन दसा बिगरत बा,नया भइल मलिकांव।।
                     ------------------
राम बहादुर राय
भरौली,बलिया,उत्तर प्रदेश




























Comments

Post a Comment

Popular posts from this blog

-
७७-जब जब परे सूखा तऽ,हरपरउड़ी गवाव        ---------------------------------- अब कहां बरिसत बाटे,झूठिया बा बादर कबो करिया कबो भुवर,तनले रहे चादर। गरजे तड़पे दिन रात,बरिसे कहां सावन धूर गरदा उड़त चले,जइसे चलत रावन। कहां परता सीत घाम,कहां गवाता गीत पहिले अस कहंवा बा,केहू के अब मीत। चलता सब सेंगरा पर,छूटल सबसे प्रेम बात केहू करतो बा,करहीं खातिर नेम। काम होखे बरखा के,अरघा खूब भराव गॉंव जवार करे खूब,अरघा के दरियाव। जब जब सूखा परे तऽ,हरपरउड़ी गवाव  नंगे हर चलवला पर,बरखा कहां अड़ाव। अब तऽ नइखे होत ई ,बाटे बात पुरान  खेती दूर से होता, बनता लोग धुरान। होत रहे खेती खूब,सुखी रहल परिवार  ठकचल रहे अनाज से, संवुसे घर दुवार। छप्पन कोटि के बरखा,बरिसत रहे सावन बनि ना पावे खायका,भीज जाव जलावन। मारत रहे झपसी जब,भीजे घर ओसार  भरे ठेघुन भर पानी, बन होखे निकसार।  झपसी में गपसल रहे,टांगुन के सब बाल मारे पछिमा गिर जाव, लागे जइसे लाल। सुनऽ हो राम बहादुर,नइखे अब उ बहार पहिले अस कुछू नइखे,दुलम बाटे लहार।                    -------------- राम बहादुर राय  भरौली,बलिया,उत्तर प्रदेश   
Read more

भोजपुरी के बराबरी भाषा दूसर करी ना

-
भोजपुरी के बराबरी भाषा दूसर करी ना ------------------------------------------------ भोजपुरी के बराबरी भाषा दूसर करी ना भोजपुरिया बेकार बा भोजपुरी के बिना। पढ़ लिख के भोजपुरी भले केहू बोली ना कहीं केहू अड़ी ना भोजपुरिया के बिना। हिन्दी में भोजपुरी बोले से काम चली ना भोजपुरिया आगे बढ़ी ना भोजपुरी बिना। पहिले वाला कवनो चिझो कहीं मिली ना नया चिझुइया अड़ी ना पुरनका के बिना। फल फूल अंचार चटनी से काम चली ना चली ना काम रोटी,भात,दाल के बिना। चाऊ,माऊ खईला बिना जिनगी चली ना थउस जाई देंह मोट अनाज खईला बिना। टिबुल,चंपाकल के पानी से काम चली ना फसल पूरा दाना धरी ना बरखा के बिना। नकल कईला से ढ़ेर दिन काम चली ना नोकरियो नीमन मिली ना पढ़ाई के बिना। लबजई,लुतुरई,चमचई ढ़ेर दिन चली ना भेद कबो खुलिये जाई कुछ बतवले बिना। ए बबुआ लिखले से काम खाली चली ना खेदा जइबऽ घर से कहियो कमइले बिना। बबुआ राम बहादुर काम तोहरो चली ना कटि ना जिनगी तोहार भोजपुरी के बिना।                  ------------------------ राम बहादुर राय भरौली,बलिया,उत्तर प्रदेश
Read more
-
उड़ि चलऽ खोंतवा में चिरइया हो  ---------------------------------------- उड़ि चलऽ खोंतवा में चिरइया हो  बान सभे सधले बा। जाल में फंसावे खातिर तोहके  माया जाल रचले बा। बनल बहुरूपिया बा मुदइया हो  गड़ांसी उ पजवले बा।   फेंकले बा सोना के दानवा हो  जाल नीमन रचले बा।   बाज हो गइल बाटे संगियवा हो  मुसकिल अब बाचले बा। उड़ि चलऽ खोंतवा में चिरइया हो  फंसाहीं वाला सभे बा।  केकरा पर करीं हम भरोसा हो   दुश्मन आपन अपने बा।  छोड़ऽ चलऽ जंगल के ओरिया हो  रहे में इहां खतरे बा।  उड़ि चलऽ दूर देशवा चिरइया हो  जहां अनगइयां सभे बा। उड़ि चलऽ खोंतवा में चिरइया हो  बान सभे सधले बा।           ------------------- राम बहादुर राय  बलिया,उत्तर प्रदेश #जयभोजपुरी  #highlight
Read more